فى المواصلات
(حنفى واقف فى الشارع مستنى ميكروباص , حنفى لقى ميكروباص جاى من بعيد فشاورله والميكروباص وقف له)
حنفى : رايح مدينة نصر يا اسطى ؟
الكمسرى : ايوه يا أستاذ تعالى .
حنفى : لا ده أنا رايح الهرم , روح انت
الكمسرى : امال بتقول ليه مدينة نصر ياعم انت , ولاهى عطلة وخلاص
حنفى : ياجدع باطمن ان فيه مواصلات لمدينة نصر , يمكن أفكر أروحها فى يوم ولا حاجة , وبعدين أنا حر أسال السؤال اللى أنا عايزه و لا هى الاسئلة بقت بفلوس اليومين دول ولا ايه ؟
(سواق الميكروباص مشى بالعربية بسرعة قبل ماخناقة تحصل بين الكمسرى و حنفى , حنفى لقى ميكروباص تانى جاى فشاورله والميكروباص وقف )
حنفى : رايح الهرم يااسطى ؟
الكمسرى : ايوه يااستاذ تعالى
حنفى : طيب معاك مكانين فاضيين ؟
الكمسرى : لا والله معلش يابيه , مافيش غير مكان واحد
حنفى : طيب كويس أنا عايز مكان واحد بس , اصل انت لو كان معاك مكانين ماكنتش هاركب .
الكمسرى (عمل انه ماسمعش حاجة ): انت نازل فين ياأستاذ؟
حنفى : نازل الهرم ان شاء الله
الكمسرى (مبتسما ): خوفو ولا خفرع ولا منقرع.
(بعد كده أدرك الكمسرى انه ارتكب غلطة فادحة لما فكر انه يهرج مع حنفى )
حنفى : لا رايح عند أبو الهول ياخفيف , سمعت انه تعبان فقلت لما أروح اطمن عليه يمكن محتاج حاجة منى كده ولا كده و أو يكمن ابنه الهول محتاج حد يوديه المدرسة . أهو زى مابيقولك اعمل الخير وارميه فى وش السواقين ياخفيف.
الكمسرى (مكشر) : الاجرة يا بيه
حنفى : عمال أقولك رايح أزرو ابو الهول وباكلمك عن عمل الخير و وانت تقولى الاجرة . الدنيا بقت وحشه أوى ياجدعان
الكمسرى : يابيه الاجرة لو سمحت عشان أشوف اللى ورايا
حنفى : هو فيه ايه يا رجالة , هى مصر كلها بقت مهمة ولا ايه , كل ما أكلم واحد يقولى خلص عشان أشوف اللى ورايا , حاجة تفقع المرارة , ماتكونش انت والولية مراتى فاتحين شركة مع بعض ولا حاجة
الكمسرى : يابيه الاجرة عشان اليوم يعدى , مش عايزين نضايق على حد
حنفى : ياماما , تصدق اترعبت يا أخى , طب ايه رأيك بقى ان أنا مش دافع الاجرة الا لما أنزل , وكله بالقانون
الكمسرى : يعنى انت فارقة معاك أوى انك تدفع لما تنزل عن انك تدفع دلوقتى
حنفى : يا جدع أنا حر أدفع دلوقتى , أدفع كمان ثانيتين , أدفع لما أنزل , أدفع المرة جاية , فلوسى و أنا حر فيها .
الكمسرى : وقف يا أسطى لما نشوف أخرتها مع الجدع ده ايه .
حنفى : آه وماله , وقف يااسطى لما نشوف أخرتها معاكو ايه
( الكمسرى يدخل ايده فى بقه ويطلع موس ويحطه على رقبة حنفى )
الكمسرى : هتدفع ولا تتشاهد على روحك
حنفى : هو حضرتك صدقت ولا ايه , ده أنا كنت بهزر معاك يا أخى . يااه , ماكنتش أعرف انك عصبى أوى كده , هى الاجرة كام ؟
الكمسرى : جنيه ونص
حنفى : خد اتنين جنيه اهمة , ياراجل اخزى الشيطان وشيل البتاع ده من على رقبتى أبوس ايدك , ده أنا كنت بهزر والله و وآدى ياعم راسك أبوسها.
( الميكروباص كمل طريقه وحنفى قاعد جواه زى الكرسى اللى هو قاعد عليه وحاطط عينيه فى الارض لحد ماوصل لمحطته , حنفى نزل زى الصاروخ وطلع يجرى ناحية أقرب .......حمام )
______________________________
حنفى بيجيب فطار
(حنفى بعد ماخرج من الحمام وحس انه هدى شوية بعد لحظات الرعب اللى عاشها قرر انه يروح يشترى فطار عشان يروح الشغل و بما ان حنفى مصرى فهو أصلا ماعندوش اختيارات فى فطاره , هو فول وبس , حنفى راح على الراجل بتاع عربية الفول اللى بيجيب منه كل يوم )
بتاع الفول (بيكلم نفسه ) : ياساتر هو الراجل الرخم ده هييجى كل يوم ولا ايه , ياساتر على الرخامة.
حنفى : ايه ياجدع انت شكلك مش طايق نفسك ليه كده؟ ووشك اتغير ساعة ماشفتنى كده ليه؟ ماتكنش شفت عفريت ولا حاجة
بتاع الفول : ياريت ياسى حنفى كان عفريت , أصل انا من غير ماخبى عليك ساعة مابشوفك بحس بانتعاشة كده فى قلبى
حنفى : ليه ان شاء الله , عبيط انت ولا ايه ؟ايه اللى بيخليك تنتعش ياخويا؟
بتاع الفول : أبدا ياسى حنفى أصلهم دايما كان بيقولولى ان أنا مافيش حد فى رخامتى لحد ماعرفتك و اكتشفت ان أنا مجرد تلميذ فى مدرستك
حنفى : طيب ياابو لسان طويل , بطل رغى بقى و اعملى 2 فول و 2 طعمية
بتاع الفول : اشمعنى غيرت طلبك النهاردة يا سى حنفى , مانت طول عمرك بتاكل 3 سندوتشات بس
حنفى : الهى ياشيخ تنطس فى نظرك , الهى وانت ماشى تخبط فى شجرة , الهى عصفورة تعمل على دماغك وماتلاقيش منديل تمسح بيه . هو أنا كنت باكل من جيب أبوك يابنى ولا انا كنت باجى أطفح عندك ببلاش . انت مالك انت , حاجة غريبة والله , هو انت شغال بياع فول ولا مخبر فى أمن الدولة
بتاع الفول : خلاص ياعم حقك عليا , ياساتر ماكانتش كلمة يعنى , باسألك سؤال عادى , أعوذ بالله , طيب ياسيدى هاعملك طلبك وتاكله بالسم الهارى ان شاء الله ( بصوت واطى)
حنفى : بترطم بتقول ايه ياابو لسان طويل
بتاع الفول : ولا حاجة , بقول ربنا يكرمك زى ماكرم غيرك قبل كده
حنفى : طب خلص عشان أنا اتخنقت منك
بتاع الفول : امال انا أعمل ايه , ممكن أسالك سؤال ياسى حنفى ؟
حنفى : اتنيل اسأل
بتاع الفول : هو انت ناوى كل يوم تيجى عندى ان شاء الله يعنى
حنفى : مضطر يااخويا , أصلك أقرب واحد للشغل , وهو لو كان فى حد غيرك كنت فكرت أقرب منك أصلا و وهو انت الاكل اللى بتعمله ده يبقى أكل بنى آدمين ده أكل بهايم يابنى بس هنعمل ايه بقى , أدينا صابرين
بتاع الفول : لا , على فكرة يا سى حنفى فى مطعم فتح جديد على أول الشارع , يعنى قريب أوى أوى من هنا والاكل اللى بيبيعه أكل بنى آدمين فياريت تجربه , ويارب تبقى زبون دايم عنده , وربنا يرحمه بقى
حنفى : ماشى يازبالة , هات الاكل اللى هاطفحه عشان أمشى
بتاع الفول : اتفضل أهو يا حنفى بيه شرفتنا ونورتنا و هتوحشنا والله انت ورخامتك
حنفى : نور لما يكهربك , ووحش لما ياكلك , يابعيد
بتاع الفول : من ذوقك ياحنفى بيه , ومش بعيد عليك الكلام اللى انت بتقوله ده , و أهو الحاجة اللى مخليانى ماردش عليك , انك ماعنتش هاتيجى التانى
حنفى : ترد عليا , الهى ترد المية فى زورك ياشيخ , يلا فى ستين داهية أنا خافى يابتاع أكل البهايم
( ومشى حنفى بعد ماحرق دم الراجل اللى ساب شغلانته وباع عربية الفول بتاعته واشتغل لميع جزم , واهو كله من تحت راس حنفى )
