انا بقى نفسى مااعملش فرح ياااااااااااه امنية حياتى اصل انا كدا كدا مش هعجب حد لا انا ولا جوزى الناس هتقول شفتو العروسة قصيرة ازاى ومش عارفة العريس الكرافت بتاعته ماكنتش حلوة وهوا كمان قصير زيها " حتى لو كان طويل" وكله كوم وشبكتها كوم تانى و و و نيجى بقى لو الفرح انعمل فرح عادى الناس هتقول شفتو العريس الهذق وهوا بيرقص " انا شخصيا من الناس اللى بتقول كدا " ولا الاغانى الناس هتقول ايه الاغانى الهابطة دى وناس تانية ممكن تقول الفرح كان هادى ومحاسناش بانه فرح ده لو كان فرح بسيط وياعينى ع العريس فروته هوا واهله بتتقطع فى اليوم ده طبعا والعروسة لازم هتاخدلها من الحب جانب " مش العريس بيتجوز يبقى اكيد العروسة هيا كمان هتتجوز هههههه"
تيجى بقى لو الفرح كان اسلامى " وانا بحبها جدا وبحترمها " بس تيجى للناس تلاقى اللى يقولك هيا جوازة ولا جنازة وتلاقى التانى اللى بيقولك هوا فيه عروسة تبقى قاعدة بعيد عن العريس " طب انتو مستعجلين ليه ماهيا هتنيها طول عمرها متعلقة فى رقبته فى الرايحة والجاية " تيجى للاناشيد " اناشيد جميله جدا وفيها معنى مش كله يرقص وهبطل ابص ع البنات وقلة ايمة" يقولولك حد يشغل قرأن ليلة فرحه وايه الاناشيد اللى تسد النفس دى احنا عاوزين نرقص ونصهلل هيا كام ليلة فى العمر دا هيا ليلة واحدة وأصل وفصل وناس تانية تقولك دول بيخلصو بدرى اوووى طبعا واخدين على افراح اخر الليل والهيصة واللمة
فى الاخر اللى بستغربله ان العريس والعروسة بذات نفسهم مش بيبقوا واخدين بالهم من اى حاجة وتيجى تفرجهم الفيديو تلاقى العروسة بتقول ايد ده هوا انا كان شكلى عامل كدا ليه وهوا جوزى ماله هوا راخر هوا ده كان فرحنا ولا احنا دخلنا فرح تانى صح ولا انا غلطانه وتلاقى العروسة اللى ماتستحى على دمها بترقص ؟؟؟؟ طب والنبى ايه لازمتها اللى بستغربله اكتر ان فيه عرسان تيت هما اللى بيقولوها ترقص الله الله ايه الحلاوة دى وفى الاخر كله بيروح على بيته وكان شيئا لم يحدث الا اللت والعجن والتقطيع فى فروة المساكين اللى لسه متجوزين جديد
طب ليه ده كله ليه انا ادفع خطيبى مش عارفة كام الف عشان ساعتين تلاتة بنقضيهم فى معصية من رقص ووو وكله بيتنسى فى الاخر ليه ؟ ليه اخليه يدفع ويكع عشان حاجة بقت مبتذلة وخليعة ؟؟؟
طب مابدل مايروح يدفع الكام الف دول نحوش ونطلع عمرة بعد الجواز مثلا بلاش عمره نحوش ونطلع انا وهوا فى مكان حلو مثلا زى مصيف او اى مكان نختاره احنا الاتنين انا مش كئيبة ولا غاوية هم انا فرحتى الحقيقية هتكون بجوزى ده لانه ان شاء الله يكون من الصالحين ويتقى ربنا فيا دى اكبر فرحة عندى انى اكون حطيت ثقتى فى الانسان الصح مش مجرد فرح بعمله عشان ارضى الناس انا من الاولى ان ادور على اللى يرضى ربنا واعمله وبعدين افكر فى رضا الناس حتى لو كانت الناس دى ابويا وأمى
انا اعرف ناس اتجوزت فى افخم الفنادق ودفعت 100000الف جنيه عشان ليلة واقسم بالله بيتندمو على الفلوس دى لانهم عرفو انهم عصوا ربنا بيهم فى حين ان فيه الاف محتاجين لجنيه واحد بلاش ليه انت تدفع 40 الف جنيه على يوم فرحك بس وانت معاكش عربية ؟؟؟؟؟؟؟ مثلا ليه يبقى بيتك محتاج للفلوس دى وتروح تصرفها على يوم واحد بس ؟؟؟؟ بجد احنا ربنا هيسألنا سؤال عسير على فلوسنا دى " من اين اكتسبه وفيما انفقه"
انا عمرى ماهرضى ان خطيبى يصرف اى مبلغ هوا تعب فيه وسهر ليالى وطلع عينه على حاجة زى دى لان ده حرام حتى لو كان المبلغ ده الف جنيه ايوه انا فرحتى وفرحة اهلى بيه يوم اما يتأكدو ان بنتهم مع انسان محترم هيخاف عليها ويصونها مش فرح فى قاعة وصرف الشئ الفلانى عليها عمر الفرحة ماكانت بالمظاهر الفرحة فى القلب فى القلب وبس عشان كدا انا بنصح اى شاب وبقوله فكر كويس شوف انت فلوسك دى رايحة فين وهل ياترى ربنا راضى عن اللى انت بتعمله بالفلوس دى والبنات بقولها انتى فرحتك مش بالقاعة ولا بالشبكة اللى بالشئ الفلانى فرحتك الحقيقة انك تعرفى انك بقيتى مع واحد يستاهلك واحد مستعد يعملك اى حاجة عشان تعيشى سعيدة وهوا لو شاف انك بتراعيه ماديا ومش متقلة عليه هوا عمره ماهيبخل عليكى بحاجة بس بالصير كل شئ بييجى والاهلى ربنا يصلح حالهم ويفوقوا من اللى هما فيه
اسفة طولت عليكو
